Thlawhna themin an in a rawn den hek tuk atang deuh tawh khan Donnie nun chu a buai deuh tawh a.
Chumi hma pawh chuan zana a mu chu SLEEP WALKING kan tih ang chi a awmin, harh si lovin a chhuak thui viau ni thin tur a ni. Tuk khat phei chu kawngpuiah a zan mu a harh hlawl a.
Tum khat phei chu an thenawmpate golf khelhna thinah a lo mu ringawt tawh bawk a ni.
Hetiang hian mumal lo takin a awm fo thin.
Zan khat chu a muhil lai a mumang ram atangin kaihthawhin a awm leh a, a mumang a cheng reng chung chuan pawnah ava chhuak a.
Pawnah chuan a mumang lama a hmuh thin, szaupui lu ang nei, mihring taksa ang nei bawk si nen chuan an inhmachhawna.
Chu sazupui hmel nei chu Donnie chuan Frank tiin a ko thin.
Frank tia a koh chhan chu a hma pawha a lo hmuh fo tawh vang a ni.
Chumi tum chuan Frank chuan Donnie hnenah chuan ni hnih chhungin khawvel a tawp dawn tiin a hrilha. Khawvel tawp hun tur leh a darkar zat nen thlap chuan a hrilh thlap a ni.
A tuk a Donnie-a a han harh chuan a bana a thil ziak, zan lama Frank’an a hrilh chu a lo la inziak reng maia. Chumi ni atang chuan Donnie chuan khawvel tawp hun tur ringawt chu a buaipui chhova.
An sikulahte chuan an zirtirtute chu a hnial chho ta fova. Tawngkam mawi lo hmang pawhin a hnial hmiah hmiah thin a.
A rilru lam daktawr tlawh thin pawh chuan a awm dan chu khawvel danga cheng daih niin Donnie nu leh pate hnenah chuan a sawi nghe nghe a ni.
Hetih lai hian Donnie te sikulah chuan hmeichhe naupang thar a rawn kal thara. Chu hmeichhe naupang nen chuan Donnie chu an inkawm ngeih zui chho ta viaua.
Donnie Darko nun mak tak. A mumang lama rawn tlawh thintu sazupui mihringin a nun a bawhbuai chhoh dan leh, a nunna aia a hmangaih ber nunna thlanga a hun a hman chhoh dan lungrun zet chu kan hmu chho ta a ni.
COMING-OF AGE LEH CULT MOVIE THA ELTIANG DONNIE DARKO
Hun rei tak chhung chu ka hard disk a movie ka dahkhawmna luahin he film hian a hun a lo hmang tawh thin a.
Film chhuak thar leh serial thar awm avangin en lohin a lo awm ngar ngara, chutia hunrei fe a awm hnuah chuan en hun a rawn tawng ve ta.
Besei a phakin a hmuhnawma. Coming of age piah lamah psychological horror a nihna thleng hian bawn tihna rauin min tuam nghal a ni ber mai.
Engnge ni a nih tihnain kan khata. Zawhna hlira khat chungin engnge thleng chhunzawm dawn tiin scene tin mai chu kan thlira.
Hlau si lovin hlauh rukna nen hun kan hmanga mahse chung chuan a hmuhnawmna leh a thawnthu ngaihnawmna an rawn belhchhah ting a ni mai si.
Tleirawl hmangaihnaah min hnuk lutin. Chu hmangaihnaah chuan mi tla lek lekin min siama. Kan thinlung a ti luangliama. Hmangaihna mawi zia, lungrun zia leh a lungchhiat thlak zia thlengin a tawng ve lo te pawh min tawn tir a ni ber mai.
Tleirawl nun. Nun inthlak chhoh laia mihringin kan rilru put hmang. Inchhungkhur buaina avanga kan hmangaih berte ni a kan hriatte laka kan him ber ni a kan hriat dante. Coming 0f age nun chiang tak mai chu fah mawl mawlh kan ni.
Heti ang em em a film tha leh belhchian dawl, zawhna a khat hi a tam lo. A tam lo kan tih rual hian keini chenna hmunah hian a ngaina pha hi awm ve tam tak ang maw?!! (Ka ring lem lo)
Cult movie ti a sawi fo a ni. Achhan ni awma a film’in a rawn tarlan han hmuh phei kha chuan a awm hliah hliah tih bak sawi theih dang a awm lo.
Ruhro kawr leh Frank-a sazupui lu, a taksa mihring nisite kha. Halloween hun velah chuan mi tam tak inchei duh dan a lo nih chhan pawh hi a lo mawh hran lo. A horror dan kha a halloween em bawk a tin ni.
A changtuteah Jake Gyllenhal chuan a changtupa ber dinhmun rawn luahin, a la naupangin a changtupa role hi a hneh hle a. Actor tha tur a piang tih a hriat hliah hliah.
An zirtirtute laka a han hel kual chho leh a bialnu laka a chet dan thleng hian chanchawp atan chuan a ang mah mah lo maw tih mai awl tak a ni.
Tin, a tak taka a farnu, Maggie Gyllenhal pawh chang vein, ani hian he filmah hian Jake-a farnu ang bawkin role a nei a. Farnu leh nuta inkara intih thiamlohna leh han inhauh deuh bawrh bawrh vel boruak tarlang tur chuan ani aia tha hi he film atan kher kher hi chuan an tam lo khawp ang.
Hmuh nuam em em chu, Jake-a bialnu lema chang, Jena Malone mawlh hian lung a dumin he role a a duhawmna hian min man chiangin, a acting leh a role hian mi a ti tlai fal zual hle bawk a ni.
Psychological thriller tam tak a awm. Coming of age film pawh thahnem tak a awm bawk. Mahse he genre pahnih nalh taka a inkawpna hi a tam hauh lo ang. Awm pawh nise hei aia tha hi chu a tam hauh lo ang.
