Zanlai, zan reh tawh hun a ni, mahse Damascus a juda rabi in chu an rawn kik dawt dawt maia. Inchung lam amite tan chuan thawm ka hre lo reng reng tihna tur chi a ni hauh lo.
Rabi chaun a mut kawr chu a siamtha sawk sawka, a lukhum te chu a khuma. Kawngkhar nam thawma rawn harh ve a fate ho chu chhuak ve lo turin a hrilh nghal zung zunga.
Kawngkhar ava hawn chuan luhkaah chuan sipai an lo dinga.
Sipai pakhat chuan, “Rabi i ni maw” tiin a lo zawt nghala.
Rabi chuan, “Aw ni e” a ti a.
Sipai chuan anmahni zui turin a ti nghala.
Sipai ho motorah chuan rabi chu a chuang ve nghala.
A thil hriat leh chanchin thar lama a hriatte a dik a nih chuan an kalpuina tur lam chu a hrethiam sa deuha.
Thui vak lo an tlan hnuah chuan sipai hmun pakhatah an luta, inchhunga pindan pakhat a an va luh chuan mi pakhat hi dawhkanah kilin a lo thu a.
Chu pa chu en thuak chuan hmuh hrehawm tak a ni. Lehkha a lo ziak mawlh mawlha. A kut tin zawng zawng chu pawh thlawn vek tih hriat deuh mai hian a tin awmna lai chu a sen tur maia.
A hmel a pawr hle a. Hai rual lohin rabi chuan amah ang thoa Israel mi a ni tih a hre nghal maia.
A lehkha thawn a ziak zawh chuan lehkha ziaktu chuan rabi hnenah chuan, “I hming sign rawh le” a ti a.
Rabi chuan mak tih hmel duh hian a en a, “I hming pawh I hre tawh na nge” a han ti a.
Rabi chu chupa chuan a chhang lo.
“I hming chu I hre lo tak tak a ni maw” tiin Rabi chuan a zawt nawn leh a.
“Ka hming chu..” tiin chu pa chuan arab hming a sawia. Mahse rabi chuan, “I hming dik tak pawh I hre tawh lo a ni maw” a ti nawn leh a.
Chutih lai mek chuan Israel rama nu pakhat chuan radio ah Israel spy pakhat Syria lamin an man thu chu a lo ngaithla ve mek bawka.
Israel Mossad Spy tha eltiang, Eli Cohen chanchin chu kan hmu chho nghal ta zung zung a ni.
ISRAEL MOSSAD SPY ELI COHEN
Kum 1967 a Syria leh Eygpt ten Ni Ruk Indona an neih tum khan Israel kha ram te zawk ni mahse awlsam tak khan hnehna changtu a ni thunga. He indona a Israel in hnehna a chan theihna tura thawh hlawk tak mai chu Israel in Syria rama enthlatu atana a tirh, Eli Cohen kha a ni
Eli Cohen hi a tirah chuan departmental store a hnathawk ve thin mai a ni a. Mahse, Syria lamin Israel an bomb a an rum khum reng avangin Israel lamin hmalak vat a ngai niin an hria a, hemi atan hian Syria lama spy tirh chu a tul niin an hria a. Vawihnih lai an lo hnawl tawh, Eli Cohen hi an recriut a, Syria lama enthlatu hna thawk turin an tir lut ta a ni.
Eli Cohen hian Syrian sumdawng hausa lem ava changa. Sawrkar lama a thu chin hote chu thianah va siamin Israel ram tan nasa takin hna a thawk chho ta a ni. Hemi chungchanga a hna thawh dante, Mossad lamin an recruit dante; hmuhnawm tak leh ngaihnawm zet chu THE SPY tih tv series ah hian kan hmu chho ta a ni.
THE SPY TV SERIES
Eli Cohen chanchin leh enthlatu hna a thawh dan tv series chu Netflix lamin 6 September khan an release a. He tv show hi mini-series niin episode paruk a awm a ni.
Heng episode parukah hian Eli Cohen-a Mossad lamin an lakluh dante. An train dan leh, Syria lama hmanhmawh taka an thawn luh tak dante chu kan hmu a. A hmuhnawm em em ringawt mai a ni.
A tir lama camera work, motor tlan lai chunglam atanga angle kawi taka an lakte. Camera sang thut leh hniam thute khan a film hian min awm hle hle tir a tum lo tih a hriat nghalin, a camera work atang khan a hmuhnawm dawn tih kha a chiang nghal renga.
Color tone ah pawh 1960’s hunlai pawl thei turin color uk hlui lamin a film tone hi a rawn tuama hei hian a entute tan 1960’s boruaka inchiah a ti awlsam viau a ni.
Series dangte anga a changtute nunhlui a thawnthu kal tluang kara zeh lam awm lovin, tun hun leh hun kal tawh kar a tlem hle a. A zeuh zeuhin, hriatthiam theih turin telh a ni a.
A thawnthu hian min tawi khawmuan pui a tum lem lova. A thawnthu kal chhovah a entute tana ninmaw hman awm lo turin min kalpui zung zunga hei hi en a nawm em em na a ni.
Tin, spy film a nih avangin spy mood chawk tho tak thei turin siam a ni a. A entuteah pawh chu mood chu a thawnthu leh a film an kalpui dan hian a rawn siam thei a, hei tak hi belchian a dawl em em na a ni bawk.
BORAT, The Dictator tih vela pa ho tak anga inlan thin, Sacha Baron Cohen chu a changtupa ber, Eli Cohen lemah changin a role hmasate atanga en chuan a talented zia a lang chiang hle.
A boruak zangkhai lai turah a comedian nihna hian a pui viaua. Serious hunah actor tha a nihna hian nasa takin boruak a rawn siam zuia. Freddy Mercury lemah khan lo chang tak tak tase ava lo inhmeh dawn em tih ringawt mai chu rilruah a lang lian duh hle a ni.
Sacha bakah hian The Americans lama CIA agent lema lo chang tawh, Noah Emmerich chu a chang ve leh bawka. Ani hi Eli handler ah changin, spy lama tv show a tawnhiat thui tak lo nei tawh a nihna a lang chiangin, a tv show ti hmuhnawmtu tak pakhat a tling bawk a ni.
Spy lam ngaina tan chuan he series hi chu hmaih chi a ni hauh lo ang. Chumi piah lamah true story a nih avang hian en ngei ngei chi a ni bawk ang.
